Gobierno chaynallataq Congreso, runamanta astawan karunchasqa

Congresista Tacnapi kaq Peru Librbentakama, yachachikuqkuna lawpa qatiq, Fernando Herrera Mamanipa llaki wañukuyninmi, qiparirachin qatun rimanakuyta gabinete Vásquez iñinankupaq. Huk rimanakuy mana allin yuyaymanasqa chaynallataq mana allin qawarisqa, congresistakunapa yachayninman hinalla, pikunam Consejo de ministros umalliqnimpa allin rimasqanman hina imallatapas uqarinanku kachkaptin aswan llakisqa kachkanku imaynallapas huk lawpi qawarisqa kayta.

Kay hatun rimanakuy qiparichiymi gobierno mana allin kasqanta waqarirachin, chayman hina hatun pantachinakuy kachkan kikinku ukupi kay musuq Constitución munasqanku rayku llaqtapa sutimpi (ichaqa lliwmi yachanchinña segunda vuelta nisqampiqa llaqta runakunaqa akllan “mal menor nisqantam”). Ichapas, kay llakikuy chayarqun kikin Umalliq Castillukama, pim yapapaykun pimientata hina chay huñunakuy llamkaqkunapa mana allin rimanakuyninman, Congresuman niykun huk kamachikuy qillqanampaq chay gas de Camisea nisqanta Estadulla aparinampaq, chaywan yapamanta aswan llakikunata qatarirachin pantasqa empresarikunapi chaynallataq dolarpa chaninchay uqarikuynimpi.

Castillupas vacancia presidencial nisqanmanta rimarirun, chaytam wakin rimana huñunakuypi llamkaqkuna, chay medios de comunicación nisqankuna chaynallataq empresariokuna chay umalliqpa kamachikuynin tukuchiq munaqkuna nisyuta munapayachkanku, kaynata nispa “vacanciamanta llumpayta rimanku ichaqa chayta ñuqa sutichayman “qillakuywan”, qillakunallam chaykunapiqa yuyaymanachkan”. Kaynata riki mana munaqninkunata huk sumllalla takaykun, chaymanta Twitter nisqantakama allichayta munarun, chaywanpas umalliq Mirtha Vasquezpa aslla ruwasqantapas usurachin.

Noticias SERpi yuyaymananiku kamachikuy ruwaqkuna chaynallataq umalliq Pedro Castillo manam allintachu yuyaymanachkanku llaqta runakunapa munayninta, chaymi kay chutaykachakuyninku, astawan yaparichinqa política general nisqanta mana qaway munayta. Kaynapiqa manam politikukunachu sasachakuyman yayakunqaku, ichaqa llaqta runakunam pikunam manaraq tarinkuchu ima allinkunatapas sasachakuyninman.

El Editorial de NoticiasSER es traducido por Enma Díaz