Huk hatun pantay suyupaq

Gabinete Bellido iñiyta hayparun chaywanpas, kamachikuqpa sasachakuyninkuna mana tukuq hinaraq kachkan, aswanqa kaykuna apakuchkan kay kimsa runakunapa quchampi premierpa, umalliq Castillupa chaynallataq Vladimir Cerronpawan. Kunankamaqa ña yachakunña paykunamanta puni imakunatapas qusqankuta chay alliqpi kaqkunaman mana allin kamachikuq qawaqkunaman chaynallataq chay wakin medios de comunicación nisqankunamampas imamantapas chaqwakunankupaq.

Llaqtarunakuna mancharisqa qawarinku kamachikuqpa mana mayman allin risqanta hinallataq mana allin kamachikuq qawaqkunata pikunam lliwpi qawarichkanku comunismuta, terrorismuta, hatun umalliqkuna tapukuyta chaynallataq imamantapas anyariyta. Iskaynimpi, kamachikuq puririchiqpi chaynallataq mana allín kamachikuq qawaqkunapi, qawachkanchik ancha hatun pantaykunata maypim suyu suyachkan kay “tercera ola” covid-19 nisqan chayamunanta hinallataq aslla qullqintapas tukupachkan kay dólarkuna chaynallataq tukuy imakunapas llumpayta chaninchakuruptin. Kay vacunación nisqan, qullqi saschakuy qatarichiy, hampi wasikuna chaynallataq yachachikuy yapamanta puririchiymi manam politikukunapa munayninkupichu kachkan.

Kaynapi, tukuy ninakuyninku chaqwakustinraq chaynallataq mana allin yuyaymanastinraq apakun hatun wasi willakuqkunamanta utaq congresistakuna tiyasqankunamanta puni, chaymi uyarichiwanchik kay política nisqan llumpay wakchayasqa kasqanta. Mayqin kamachikuq ruwaqkunapipas manan allin munaynin kanchu aslla rimanakuymay chayanankupaqpas chay kamachikuykunata allinta qawaykuspanku puririchinakupaq. Wakinkunam awqanakuchkanku kamachikuy ukumpi imaynatapas atipay haypayta munaspa, hukninkunañataq imaynatapas kamachikuqta wichichiyta munachkanku utaq ima rimanakuytapas churachkanku qipa punchawkunapaq chay paykunapaq munaynin kasqanman hina (electorales nisqampaq utaq, pim yachan, gubernamentales nisqampaq).

Noticias SERpi willarikuniku ancha llakisqa kasqaykuta kay suyunchik mana may risqan yachakuyninwan. Ancha chuyañam kachkan kay kamachikuqnata nitaq gobierno mana allin qawaqkunatapas mayqinnintapas imapas hukunchu kay ancha sasachakuy allichanankupaq, aswanraqchusmi kusirikunku kaywan, democracianchiñataq patallampiña tarikuchkan. Chaymi, wakin punchawkuna hina, llaqta runakunaman qapipakuna kay clase política nisqanta chaqwarinampaq peruanukunapa chaynallataq peruanakunapa kunan kawsakuyninwan nitaq qamuq pachawan manaña pukllayta hina ruwanankupaq.

El Editorial de NoticiasSER es traducido por Enma Díaz