Nitaq “llaqta” nitaq “ñampi kaqkuna”

Umalliq Pedro Castllupa llaqtaman willarikuyninmi qunqayllamanta hayparuwanchik mana aslla rimayllanwanchu, astawanqa ña chay riqsisqa ruwaykuna kasqanmanta mana huk imapas kayninwanmi, yaqapas allin hina karun chay vacuna sputnik wasi qispichiyninmi kayllapi vacuna ruwanankupaq, ichaqa asllanman tukurun saludpa umalliqnimpa willakuyninwan chay wasiqa qipa watakunaraqsi ruwachikunqa, chay hina rimariynimpi qipallampiña nirun “sapa kuti qatipasqa kanqaku” umalliqkuna, chay rimayninmi karun sasachakuymanta lluqsinallampaq hina ichaqa chaywan mana allichanchu sunturpa sasachakuyninta astawanraq kikillanmanta imapapis yaykuchkan chay gobierno mana allin qawaqkunapa mana ima ruwayllanwan.

Kaylawnimpi, Comisión del Congreso nisqampa kamachikuynin kachkan kay gobierno “cuestión de confianza nisqanta” mana ruwanampaq, chaywanmi kamachikuq ruwaqkuna qawachikuchkan imaynatapas qapipakuyta munasqankuta kay sueldunku, tiyasqanku chaynallataq tukuy ima munayninkunata kay pichqa watantin mana qichuchikunankupaq.

Chaynapi, semanan semanammi, politikapi kaqkuna qawachikuchkanku mana atiyniyuq kasqankuta suyu may riy munasqanta puririchinankupaq. Mana ima allin kamachikuy ruwaykunawan chaynallataq mana ima allin kamachikuynunawan, chaywan qawachiwachkanchik mana ima ruwaynkuna kasqanta nitaq chay ruwaykuna may risqantapas. Lliw politikapi kaqkuna manam yuyaymanankuchu suyuta nitaq qawarinkuchu kay ancha qullqi sasachakuypi chaynalaltaq hatun unquy sasachakuypi chawpimpi kasqanchikta.

Noticias SERpi yuyaymananiku ima ruwaykunatapas utqayman taripana kanqa kay sasachakuymanta lluqsinapaq chayqa kanqa sichu hatun rimanakuy haypakuptin kay kamachikuqwan chaynallataq kay parlamento nisqan ukumpi kamachikuq mana allin qawaqkunawan kay qullqi saschakuyta qatarichinapaq hina chaynallataq kay institucionalidad democrática nisqanta waqaychaspa, kay umalliq urqunamanta utaq congreso wichqanamanta qipapi saqistin. Sichu suntur umalliqkunata urquna kanqa, kunanmi chay ruwanapaq. Manchayqa “llaqta” chaynallataq “ñampi kaqkuna” inskaynin kamachikuqkunapa rimariyninta qipancharunqaku, chayman hina paykunapaq imakunapas tikrarirunman mana allichay atinankukama.

El Editorial de NoticiasSER es traducido por Enma Díaz