Umalliqpa watanakuynin

Umalliq Pedro Castillo Breña wasipi sapakama huñunakuynin, kunan qipakunalla willay kamayuq chuyanchachisqan, musuq gobiernupa nisyu mana allin ruwaynin kachkan kay asllaraq tawa killalla kamachikuy apasqampi. kamachikuqpa qipa rimariynin, karumanta chuyanchanan kachkaptin, astawan llakikunata yapapaykun kay imaynampis runakuna chay quñunakuykunaman rirqaku.

Chaynallataq astawan kallpancharachin Umalliq mana allin qawaqkunata, pikunam kay ruwaykunamanta qapipakunqaku chaynallataq imakunatapas maskanqaku Castillo kamachikuymanta lluqsinampaq. Kay ruwaykunapa chiqap kayninqa manam amachakuypaq hinachu. Manataqmi allinchu ñawpaq gobiernukuna chaynallataq politikukuna mana allin ruwasqankumanta qapipakuypas. Chaymi, kay mana allinkunapi puriyninku nisyu piñarikunapaq aswanraq pim umalliq hina akllasqa kachkaspam kamachikuynimpi chay Estaduta kikillankupaq qawaqkunata mana qatallinampaq.

Kay ruwaykuna apakusqanwan, Castillo huk kutitawan qawarirachikun mana allin yachayniyuq kasqanta kay kamachikuy apanampaq, ichaqa, huk tikrayman, ancha yachaniyuq kachkan yanapaqninkunata sasachakuykunaman qaykunampaq, Estadupa ruwayninkunata qipanchaspa. Allilla qawaykusqaqa, nitaq Castillo, nitaq yanapaqninkuna, nitaq gobiernuwan mana allin tupaqkuna chay kamachikuymanta urquy munaqkunapas manam llaqtarunapa suyasqanman hinachu imatapas ruwachkankuchu kay unquy chaynallataq qullqi sasachakuy chawpimpi.

Llaqta runakuna nisyuta millakurun kay clase política nisqanta chaymi kachkan kamachikuqkunapa munaynin llaqtapa sasachakuyninwan rakinasqa kaptin. Chaynapi, peruanukunapa chaynallataq peruanakunapa sunqunchik usyarun manachusmi Estadumantaqa imatapas suyachuwanñachu. Chaywampas, Noticias SERpi astawan mañakusaqku qatipakuy kanampaq utqayllaman yachakunampaq maykamas Pedro Catillupa ruwayninkuna qayparun. Qipakuna ima apakusqampas política pukllayninman hinam kanqa.

El Editorial de NoticiasSER es traducido por Enma Díaz