Yachay wasiwan yapamanta taripanakuspa

Warmi qari warmakuna chaynallataq malta warmakuna kay iskay wata qatun unquy qallarisqanmanta kaq ñawinchayman kutiyninkum allin willakuymi kachkan chay kamachikuytam lliw llaqta runakuna allinta waqaychanan. Yachaqkunapa kutiyninku chay uya pura huñunakunankumpaq chaynallataq ñawinchanankupaq ancha allinmi kawsakuynin sumaq qispinanpaq chaytam suyu chaynallataq yachaywasipi llamkaqkuna qawarinanku huk ruwayta hina chaynallataq musuq qallariyta hina kay eduación peruana nisqampi.

Ichaqa, kay servicio educativo nisqan Perúpaq hinallaraq hatun sasachakuynin kachkan. Lliw yachasqanchikpi hina, kay escuela pública sumaqta qawarina kachkaptin allin kawsakuyman chayanapaq, Estado sapa kuti qipaman churan. Kay sector nisqan sumaqta puririchinapaq achka ruwaykunam kachkan chaywampas, manan puntaman churankuchu may kasqanman hina, chaykuna raykum hinallaraq kachkan qatun qipanchakuykuna kay yachaqkunapa ñawinchaynimpi chaynallataq yachariynimpi, sapa wata chaynalla qawarisqa kachkan, sapa qatipaykunam churawanchin wakin suyu llaqtakunapa qipampi.

Yachay wasikunapa wichqakuynin kay qatun unquy rayku aswanyarachin qipanchakuykunata. Mana allin yachachikuykunaman, pisilla infraestructura nisqanman chaynallataq warmakunapa mana allin mikusqa kayninkuman, yapakurura chay conectividad nisqan mana allin chayaynin, chaynallataq wasikuna nitaq llaqtakunapas mana allin equipasqa tarikurqa kay “Aprendo en Casa” nisqan allin apakunampaq, Estado kay estrategia de educación a distancia nisqanta puririchirqa yachachiyta sayarichinampaq kay qatun unquy qawariynin ukumpi. Yachachiqkunapa, mama taytakunapa, estadupi llamkaqkunapa chaynallataq kamachikuqkunapa tukuy niraq ruwasqankupas manam atirachu qipachiyta chay yachachikuy ukumpi sasachakuykunata.

Asllapas kanman hina, kay qatun unquy ancha llakita aparamun waranqantin warmi qari warmakunapaq mama taytanku utaq ayllunku kay unquywan wañuruptinku, chaymanta wichqarayasqa kaynimpas chaynallataq wakin warma masinkunawan mana imayna huñunakuy atiynimpas, ancha mana allinkunata saqirun chaykunatam chayllaraq qawarisun, chaykunamanta sector educación nisqan manaraq imatapas nitaq asllatapas yuyaymanachkankuchu, astawanqa uma nanaywan qapichikuykanku kunan kaq sasachakuykunallawan, kay emergencia sanitaria nisqanwan chaynallataq imaynatataq aparinqaku ruwaykunata kay presencialidad nisqanman kutinapaq.

Noticias SERpi napaykuniku kay ñawinchayman kutiyninkuta chaynallataq suyunchikpa warmi qari warmakunapa hinallataq malta warmakunapa kusikuyninta ñuqaykupata hina apariniku kay yachay wasinkuwan yapamanta taripakuyninkuwan. Chayman hina Ministerio de Educación nisqanta, gremio magisterial nisqanta, warmi qari yachachiqkunata, chaynallataq lliw peruano llaqta runakunatapas qayariniku kay kutiynikuqa manam allinllachu kanan, ichaqa huk qallariy hina kachun kay peruano yachay wasita allinta puririchinapaq mana yachaykuna chaskinallapaq hinachu ichaqa astawan kanan llaqta runa hina hispinapaq. Chay raykum, punta ruwayqa kachkan, yachaqkunata manaraq qatipayta qallarisqa, sumaqta hatallinanku, uyarinanku chaynallataq saqirinanku chay ima ruway munasqankuta qatun unquy qichusqanta aslla asllamanta uqarinankupaq.

*El Editorial de Noticias SER es traducido por Enma Díaz *